Tekokatu

Moñepyrũ

Ára ha ára ohasávo jahechakuaa ñande jerére, jaikohápe, ñande távape, ñane retãme ha ko yvórape ojehuha heta mba’e ivaíva: oñorairõva, ojoja’óva, ipochyvaíva, ojejapíva, ojekutúva, hamba’e. Kakuaáva, imitãrusúva, kuimba’e térã kuñáva, taha’e ha’ehápe, ndaikatuvéi jaiko py’aguapy ha joayhu pópe.

Ko’â mba’e vai ohechauka ñandéve ndaiporiha Tekokatu pe ñande rógape, ñande rogaykereguápe, ñande távape, ñane retâme; ha amo hapópe, ndaiporiha tapicha hekokatúva ko yvy ape ári. Ndaipórigui Tekokatu, ndaipóri avei avei vy’a, tekojoja, jekupyty, tesâi, mborayhu ha arandu; ko’â tekopy marangatu rekovia jajuhukuaa vy’a’ỹ, pokarê, mbarete, ñembotavy, mba’asy, ñorairô, ñaña, tavy ha mano. Ha pe mba’e ivaietevéva niko opavave vaicháku jajepokuaáva jahávo mba’e vaíre. Avavépe nomondýi umi mba’e vaieta ojehúva oparupiete.

Upéicha avei, tekovekuéra ñaiméva guive niko heta jey ndajaikuaaporâi ma’erâpa jaju ko yvy ape ári; ja’eporâsérô, ndajaikuaaporâi ma’erâvoípa ñande rekove. Jepémo upéicha, jajuhukuaa ñande apytépe -mbovymíramo jepe- kuimba’e ha kuña oñeha’âva oiko tekopotîme ha mbeguekatúpe oñeha’âva hikuái ohupyty pe Tekokatu. Ko’â tapicha apytépe ñaime avei ñande Masonería-pegua; akóinte jaipykúiva Tekokatu rape ha upekuévo ñañeha’âvajepi ñambohovái hendapete umi porandu ñanemyangekôiva: “moôguipa jaju”, “mávapa ñande” ha “moôpa jaha”. Ha’ehaguéicha, mbovymínte ñaime umi jajepy’apyva rehegua ñande rekovére; ha hetaitereirasa oime upérupi ñande rapichakuéra hekomarâva ndoikuaáiva ma’erâpa ñaime ko yvy ape ári.

Hetepy

Masoneria-pe jaike haĝua niko ojejerurékuri ñandéve mokôi mba’e: tekosâ’ỹ ha tekopotî. Aipórô, ápe jeko ñaime umi ñanerekosâ’ỹva ha upekuévo ñanerekopotîva. Oje’e avei ápe ñaimeha umi poravopyréva jajúva ñande itamarâmíre, mbeguekatúpe ñañeha’â haĝua jajapo ichugui peteî itamarâ’ỹ. Pe ita niko ñandevoíhina. Ñande -ñane rembiapo rupive- jahekýita ñandejehegui umi mba’e ombyaíva ñande reko.

Ápe, ára ha ára, oje’e ñandéve tekotevêha ñamopotî ñande rekove ku hesakâha meve, tove tahenyhê mborayhu, tekojoja, tekosâ’ỹ, jekupyty, arandu ha vy’águi; ikatuhaĝuáicha upéi ñasê pe ñande rekohápe ñamyasâivo umi mba’e porâita, jahupytýva Masonería ryepýpe.

Tekokatu jahupyty haĝua tekotevê ñande rekovégui oiko mborayhu ryru, mborayhu raity, mborayhu renda. Tekokatu ha’ehína mborayhu reko, ha mborayhu reko ha’ehína Tekokatu. Masón noñandúiva mborayhu, ndaha’éi Masón. Pe mba’e tuichavéva jaguerekóva hupytyrâ niko pe mborayhu. Masonería-pe mborayhu ha’ehína ypy ha paha. Kóva ha’ehína pe ñane rembipuru tuichavéva. Mborayhu’ỹre ñande ndaha’éi mba’eve.

Upévare che joyke’y, nemandu’áke:

Mborayhu ñañanduva’erâ GADU∴ rehe, opaite mba’e apohára.

Mborayhu ñañanduva’erâ ñe’êre. Ñane ñe’êngatúva’erâ.

Mborayhu ñañanduva’erâ ko arapýre: kuarahy ha mbyjamimíre, ohechaukáva ñandéve GADU∴ hembiapokatu, porâ, tuicha ha ijapyra’ỹha.

Mborayhu ñañanduva’erâ ñande rekoháre ha upehaguére ñañangarekova’erâ hese.

Mborayhu ñañanduva’erâ yvy, yvytu, y, tata, ita, ka’avo ha mymbamimíre, ha’éva hikuái umi mba’e ombohetia’e ha ombojeguáva GADU∴ rembiapokatu.

Mborayhu jaguerekóva’erâ arandúre, ha’égui upéva pe tembipuru tuichavéva ñanderesape’áva jaiko haĝua hekopete ko yvy ape ári.

Mborayhu ñañanduva’erâ ojuehe ñande Masön-kuéra, ñañombohérava: joyke’y.

Mborayhu ñañandúva’erâ akóinte mba’apóre. Umi omba’apóvante oguata Tekokatu rapére, ha upéicha avei umi omba’apo’ỹva katu oipykúi Tekomarâ rape.

Mborayhu ñañanduva’erâ ñane pehênguekuéra rehe: ñande ru, ñande sy, ñane rembireko ha ñane ñemoñarére.

Mborayhu ñañanduva’erâ ñande rapichakuérare, ha’égui ñandéicha GADU rembiapokatu ha remimoîngue ko yvy ape ári.

Mborayhu ñañanduva’erâ mitâmimíre, ipukavýpe ohechaukáva ñandéve tekokatu rape.

Mborayhu jaipuruva’erâ ñahekombo’e haĝua opavave ñande rapichakuérape, ñañeha’âvévo umi itavy, imboriahu ha heko’asývare.

Mborayhu ñañanduva’erâ umi hasykatúvare.

Mborayhu ñañanduva’erâ umi ñande’apo’ívare.

Mborayhu jarekóva’erâ ñane rembikuaa, ñane rembipota, ñane remimbyasy, ha opaite ñane rembiasáre.

Mborayhu ñañanduva’erâ tekopotî, tekosakâ, tekojoja, tekosâ’ỹ, tekoayhu, vy’a ha jekupytýre.

Mborayhu jaipuruva’erâ jahesape’a haĝua umi ñande rapicha ojavyva’ekue hape: oporojukáva, omondáva, ipokarêva, imbareterekóva, itavýva, iñañáva, ojahéiva hapicháre, imba’epotáva, ha opaite hekomarâva rehe.

Mborayhu ha’ehína upe ñanemoĝuahêtava Tekokatúpe.

Mborayhúgui henyhêva, katuete ohupyty tekokatu; ha upe hekokatúva ohupytypáma opaite mba’e jahupytykuaáva…

Che joyke’ykuéra, ko’â mba’e ambohysýiva’ekue ñamoañetéramo ñande rekovépe, jahupytýta Tekokatu. Aipórô:áĝa peñeporandúvo mávapa hína Masonería remiñongatu tuichavéva?. Peteîmínte oî imbohováirô: Mborayhu.

Mohu’ã

Jahekáke mborayhu.

Jahupytýke mborayhu.

Ñañemomba’éke mborayhúre.

Ñañandúke mborayhu.

Jaipurúke mborayhu.

Ñamyasâike mborayhu.

Mborayhu rupive ñamoambuéta ñande rekoha, ñande róga, ñande rogaykeregua, ñande táva, ñane retâ; ha amo hapópe, ñamoambuéta ko arapy. Upe ára oĝuahêvo… ta’ângambyrýpe hetaitevéne marandu porâ ha pokâpokâmíne marandu vai.

Masón ñande rekópe, ndaikatúi jajavy ñande rape. Ñasêke ha ñamba’apo kane’ô’ỹre jahechápa ñahenonde’a upe ko’ê pyahu, upe ára pyahu, opavave jaipotáva.

Ha’ese peême tekombo’e ha’ehína pe tembipuru jaguerekóva ñamyasâi haĝua mborayhu. Tavy, mboriahu ha teko’asýgui ñanohêta ñande rapichakuérape tekombo’e rupive. Ndaipóri ambue tape. Tekombo’e ha’ehína mborayhu rembipuru. Peteî mitâ térâ mitârusu oñehekombo’éva hekopete ha tekopotîme, ha’etahína peteî mitâ térâ mitârusu oñandukuaátava ha omyasâikuaátava ñanendive upe mba’e porâitéva hérava mborayhu.